អ្នករចនាម៉ូដដើមកំណើតជប៉ុនដ៏ល្បីមួយរូបវ័យ៨១ឆ្នាំ គឺលោក Kenzo Takada បានលាចាកលោកហើយកាលពីថ្ងៃអាទិត្យចុងសប្តាហ៍ទៅនេះ ក្រោយពីបានឆ្លងជំងឺកូវីដ១៩ COVID-19។ ដំណឹងមរណភាពរបស់លោក ទទួលបានការចាប់អារម្មណ៍និងមានអ្នកចូលរួមសម្តែងការសោកស្តាយយ៉ាងខ្លាំងពីសំណាក់បុគ្គលល្បីៗ នៅលើពិភពលោក ជាពិសេសក្រុមអ្នកដើរម៉ូដ។ លោកមានឈ្មោះបោះសំឡេងខ្លាំងនៅក្នុងស្រទាប់នៃអ្នករចនាម៉ូដល្បីៗលំដាប់ពិភពលោក ដ្បិតលោកមានភាពច្នៃប្រឌិតខ្ពស់ក្នុងការរចនាម៉ូដ ជាពិសេសលោកមានសិល្បៈក្នុងរចនាម៉ូដដែលគួរឲ្យទាក់ទាញ ដោយលាយបញ្ចូលគ្នានូវស្ទាយបែបជប៉ុននិងលោកខាងលិចហើយសំខាន់គឺការលាយស្ទាយបែបបារាំង។ 
ក្រៅពីហ្នឹង លោកបានបង្កើតយីហោមួយដោយខ្លួនឯងមានឈ្មោះ Kenzo ដែលជ្រកក្រោមក្រុមហ៊ុនសម្ព័នដ៏ធំរបស់បារាំងគឺក្រុមហ៊ុនសម្ព័ន LVMH Moët Hennessy Louis Vuitton ឬត្រូវបានគេហៅយ៉ាងខ្លីថា LVMH។ Kenzo គឺជាប្រែនដ៏ល្បីមួយលំដាប់ពិភពលោកដែលមានផលិតផលដូចជាទឹកអប់ កាបូប វ៉ែនតា ស្បែកជើង សម្លៀកបំពាក់ ជាដើម -ល- ហើយប្រែននេះមានអ្នកគាំទ្រជាច្រើននៅតាមបណ្តាប្រទេសផ្សេងៗ ហើយក្នុងនោះក៏មានកម្ពុជាផងដែរ៕
