ពីធីបុណ្យចូលឆ្នាំខ្មែរ ឬមហាសង្ក្រាន្ត គឺជាពិធីបុណ្យប្រពៃណីជាតិ ដ៏ធំដែលប្រជាជនខ្មែរយើង ប្រារព្ធធ្វើជារៀងរាល់ឆ្នាំប្រកបដោយអត្ថន័យជ្រាលជ្រៅនិងពេញដោយសាមគ្គីភាព។ “សង្ក្រាន្ត” មានន័យថាដំណើរដាច់ឆ្នាំចាស់ផ្លាស់ឆ្នាំថ្មី។ ក្នុងឱកាសនៃការប្រារព្ធពីធីបុណ្យចូលឆ្នាំថ្មីនេះប្រជាពលរដ្ឋខ្មែរតែងតែមានទម្លាប់រៀបចំសម្អាតផ្ទះសំបែង និងតុបតែងរចនាប្រកបដោយសិល្បៈទៅតាមធនធាន ព្រមទាំងទៅតាមការនិយមតាមតំបន់នីមួយៗផងដែរ។ លើសពីនេះទៅទៀត ប្រជាពលរដ្ឋខ្មែរក៏និយម ក្នុងការតុបតែងខ្លួនឲ្យបានស្អាតបាត និងប្រើប្រាស់សម្លៀកបំពាក់ថ្មីៗ ទាំងតាមបែបប្រពៃណី និងតាមសង្គមសុីវិល័យ ដើម្បីត្រៀមទទួលពរជ័យពីទេវតាឆ្នាំថ្មីដោយគ្រប់គ្នារមែងតែងតែតាំងចិត្តគិតថា ឆ្នាំថ្មី ចិត្តគំនិតថ្មី កិច្ចការថ្មី ជោគជ័យថ្មី។
តើមូលហេតុអ្វីបានជាប្រជាជនតែងមានទម្លាប់ប្រើប្រាស់របស់របរ និងស្លៀកសម្លៀកបំពាក់ ថ្មីៗក្នុងឱកាសបុណ្យចូលឆ្នាំថ្មី? ទាក់ទិននឹងរឿងនេះម៉ូដអាស៊ីសូមលើកមូលហេតុ ៥ យ៉ាង ដែលប្រពលរដ្ឋខ្មែរតែងតែស្លៀកពាក់ថ្មីក្នុងឱកាសបុណ្យចូលឆ្នាំ៖
១/ មនុស្សរមែងចង់ស្អាត៖ ប្រជាពលរដ្ឋខ្មែរយើងភាគច្រើនជាប្រជាកសិករ ធ្វើស្រែចំការ ដាំដំណាំចិញ្ចឹមសត្វផ្សេងៗ ចំណាយពេលច្រើនទៅនឹងកិច្ចការកសិកម្ម ពុំសូវមានពេលទំនេរដើម្បីតុបតែងខ្លួនប្រាណនោះទេ។ ដ្បិតខែមេសាជារដូវប្រមូលភោគផលរួចរាល់ហើយ មានទាំងប្រាក់ កាសមានទាំងពេលវេលាផងនោះ វាក៏ជាពេលវេលាដ៏ល្អដើម្បីកាត់ ឬទិញសម្លៀកបំបាក់ថ្មីៗត្រៀម សម្រាប់ឆ្នាំថ្មី។ តាមទំនៀមទម្លាប់ក្នុងឱកាសចូលឆ្នាំថ្មីប្រជាពលរដ្ឋខ្មែរតែងស្លៀកសំពត់បត់ ហូល ផាមួង អាវប៉ាក់ ខោចែវ អាវអាចារ្យ ជាដើម ប៉ុន្តែក្រៅពីនោះពួកគាត់ក៏អាចប្រើរបស់ប្រេនៗ ដូចជា សម្លៀកបំពាក់ គ្រឿងអលង្ការ កាបូប ស្បែកជើង ដោយប្រើប្រាស់សម្របទៅតាមកាលៈទេសៈផងដែរ។
២/ ដើម្បីស្វាគមន៍ទេវតាឆ្នាំថ្មី៖ គឺមានន័យថាស្វាគមន៍សិរីសួស្ដីថ្មី ជម្រះចោលឱ្យអស់នូវ ឧបទ្របចង្រៃហ្មងសៅនៅឆ្នាំចាស់។ ដូច្នេះ ការប្រើរបស់របរក៏ដូចជាស្លៀកពាក់ថ្មីៗ គឺបង្ហាញថាយើង បានត្រៀមខ្លួនរួចជាស្រេចក្នុងការទទួលយកនូវរឿងរ៉ាវល្អៗ និងភាពសុខដុមរមនាតរៀងទៅ។
៣/ ត្រៀមខ្លួនក្នុងការជួបជុំ៖ ចូលឆ្នាំថ្មី ប្រជាពលរដ្ឋប្រុសស្រីទូទាំងប្រទេសមានឱកាសឈប់ សម្រាក ដើរលម្ហែ និងធ្វើដំណើរទៅជួបជុំបងប្អូនលេងល្បែងប្រជាប្រិយកម្សាន្ត ឬចាំទទួលបងប្អូន មិត្តភក្តិមកពីគ្រប់ទិសទី។ ដូច្នេះការប្រើរបស់របរនិង ស្លៀកពាក់ថ្មីៗឱ្យបានសមរម្យ គឺដើម្បីស្វាគមន៍បង ប្អូនញាតិមិត្តជិតឆ្ងាយផង ហើយក៏ដើម្បីបង្ហាញអំពីជីវភាព និងភាពសុីវិល័យទៅវិញទៅមកផង។ គ្នុងយុគសម័យដ៏ទំនើបនេះ ក្នុងការជួបជុំផ្សេងៗបែបមិនផ្លូវការ មនុស្សសម័យទំនើបមិនបានស្លៀកពាក់ ហូល ផាមួង ខោចែវ ឬអាវអាចារ្យនោះទេ ជំនួសមកវិញ ប្រជាពលរដ្ឋនិយមប្រើរបស់ប្រេនៗ ម៉ាក ទាន់សម័យ ក្នុងនោះមានដូចជា ខោអាវ សម្លៀកបំពាក់ ស្បែកជើង ខ្សែក្រវាត់ កាបូប គ្រឿងអលង្ការ ។ល។
៤/ ដើម្បីចូលរួមក្នុងពិធីបុណ្យទានផ្សេងៗ៖
ប្រជាពលរដ្ឋកម្ពុជា ជឿលើ បុណ្យនិងបាប ដូច្នេះហើយក្នុងឱកាស បុណ្យចូលឆ្នាំថ្មី រមែងតែងតែនាំគ្នាទៅវត្តដើម្បីធ្វើពិធីរាប់បាត្រ ស្រង់ព្រះ ពូនភ្នំខ្សាច់ សូត្រមន្តរំដោះគ្រោះ បង្សុកូល ជាដើម។ ដូច្នេះ ការប្រើប្រាស់របស់របរ និងស្លៀកពាក់ថ្មី គឺជាការត្រៀមខ្លួនក្នុងការធ្វើបុណ្យដាក់ទាន ជម្រះចោលនៅភាពហ្មងសៅសម្អាតចិត្ត ឱ្យជ្រះថ្លាបង្ហាញអំពីភាពស្អាតផូររផង់ ទាំងចិត្តកាយ និងគំនិត។
៥/ បន្ថែមរបស់ប្រើប្រាស់សម្រាប់ឆ្នាំថ្មី៖ សម្រាប់ប្រជាពលរដ្ឋខ្មែរយើង ពេលវេលានៃឱកាស បុណ្យចូលឆ្នាំថ្មី គឺជាពេលដ៏ល្អបំផុតដើម្បីទិញរបស់របរប្រើប្រាស់ចាំបាច់ក្នុងគេហដ្ឋានមួយចំនួន ដូចជា គ្រឿងសង្ហារិម ចង្ក្រានចានឆ្នាំង និងសម្លៀកបំពាក់ជាដើម។ ការប្រើប្រាស់របស់ថ្មីៗ គឺបង្ហាញពី សិរីសួស្ដី និងក៏ជាការត្រៀមទុកសម្រាប់ប្រើប្រាស់ក្នុងពេញមួយឆ្នាំផងដែរ។
